ASTANA. 25 mamyr. О́tken aptada Máskeýde qazaqtyń kórnekti aqyny, sazger Tursynaı Orazbaıqyzy qaıtys boldy. Senbi kúni qalamger týǵan óńiri Ońtústik Qazaqstan oblysyna jerlendi. Bul týraly otyrar.kz habarlady.
Qoshtasý rásimi Shymkenttegi Shámshi Qaldaıaqov atyndaǵy fılarmonııa aldynda ótti. Qaraly jıynǵa halyq kóp jınaldy. «Qazaq tili» gazetiniń redaktory Orynbasar Qýandyqov: «Ońtústikte 100-den astam jazýshy bar bolsa, bizder, Reseı qazaqtary úshin Tursynaı sııaqtylar bireý ǵana. Ol kisiniń aıtqan sózderinen ónege tógilip turatyn. Men úshin búgin óte qaıǵyly kún», – dedi.
Tursynaı Orazbaıqyzy 1950 jyly 19 aqpanda Ońtústik Qazaqstan oblysy, Saıram aýdany, Qaınarbulaq aýylynda týǵan. Qazaq memlekettik ýnıversıtetiniń jýrnalıstıka fakýltetin, Máskeýdegi joǵarǵy ádebıet kýrsyn bitirgen. Jastaıynyn ánshi ári aqyn retinde kózge tústi. Oblystyq drama teatrynda, «Ońtústik Qazaqstan» gazetinde, qazaq radıosynda, jazýshylar odaǵynda, Saha Respýblıkasynyń Qazaqstandaǵy ókildiginde jumys istegen. Uzaq jyldar Máskeýdegi halyqaralyq jazýshylar odaǵy qaýymdastyǵynda qazaq ádebıeti boıynsha keńesshi qyzmetin atqardy.
Tuńǵysh óleńder toptamasy «Jalyn» baspasynan shyqqan «Qanat qaqty» atty jınaqta jaryq kórdi (1975 j.) «Tańǵy shapaǵy», «Ińkár júrek áýeni», «Gúlsezim», «Ty moıa vesna» syndy jyr jınaqtary orys, saha jáne týva tilderine aýdaryldy.
Halyqaralyq «Alash» jáne A.Fadeev atyndaǵy ádebı syılyqtardyń laýreaty. Saha-Iаkýtııa Respýblıkasynyń eńbek sińirgen mádenıet qyzmetkeri.
Elaman Qońyr.
Derek, sýret: otyrar.kz.