Astanada besinshi dúrkin ótken Álemdik jáne dástúrli dinder lıderleriniń V sezi dinderaralyq únqatysýdyń aıqyn alańyna aınaldy. Nebári 13 jyldyń ishinde búkilálemdik deńgeıde moıyndalýy sezdiń mańyzdylyǵyn, ózektiligin kórsetedi. Elbasymyz N.Á.Nazarbaevtyń salıqaly saıasatynyń arqasynda onyń ómirsheńdigi dáleldenip otyr.
Sezge qatysqan spıkerlerdiń biri Vatıkan Papasynyń Dinaralyq únqatysý keńesiniń prezıdenti, kardınal Jan-Lýı Torannyń «Astana tek qana Qazaqstannyń astanasy emes, ol barlyq dinder únqatysýynyń astanasyna aınaldy», – dep málimdeýinde úlken mán jatyr.
Sezde kóterilgen mańyzdy máselelerdiń álem aldynda bereri kóp. Ásirese, ıslam qoǵamyndaǵy dinı daǵdarystyń, ahýaldyń turaqtanýyna septigin tıgizedi dep kútilýde.
Sezdiń seksııalyq jumysyna qatysqan elimizdiń Bas múftıi Erjan qajy Malǵajyuly da tushymdy oılaryn ortaǵa salǵan kezde shetelderden kelgen qonaqtar oń pikirlerin bildirip otyrdy.
– Din – búkil álemde adamdardyń rýhanı dúnıetanymyn baıyta otyryp, jer betindegi adamzat qaýymynyń ómir súrý ıgiligine óz úlesin qosatyn qýatty kúsh. Sondyqtan, sol kúshti adamdar arasyndaǵy dostyq pen yntymaqqa jáne memleketimizdiń damýyna jumsaýymyz qajet. Al ózara kelisim men jarasymdylyqqa ıslam dininiń qosar úlesi ólsheýsiz, – dep Bas múftı ıslam dininiń negizgi qundylyqtarynyń biri – beıbitshilikti dáriptedi.
Álemdik jáne dástúrli dinder kóshbasshylarynyń sezi óziniń máni men mańyzdylyǵyn eshqashan joǵaltpaq emes. О́ıtkeni, qazirgi jahandaný dáýirinde jer betindegi barlyq adamzat beınebir qalada ómir súrip jatqandaı. Olaı bolsa, adamzat dinine, násiline, ultyna qaramastan, yntymaqta, beıbitshilikte, tatýlyqta ómir súre alatynyna osy sezdiń alańy eń úlken dálel bolyp qala bermek.
Ershat OŃǴAROV,
QMDB apparat bóliminiń
meńgerýshisi, teolog, PhD.