«Máńgilik El» konserti ótti

Keshe elordadaǵy Ulttyq mýzeıde Astana kúnine jáne mýzeıdiń 1 jyldyǵyna oraı «Máńgilik El» atty konsert ótti. Merekelik sharada Qazaqstannyń eńbek sińirgen ártisi, kúıshi-kompozıtor Seken Turysbekov jetekshilik etetin «Aq jaýyn» memlekettik kameralyq orkestri men «Serper» kúıshiler toby óner kórsetti. Eń áýeli mýzeı kireberisindegi atrıýmda dombyra patı uıym­das­tyryldy. Bul sharaǵa «Serper» jáne «Kókbóri» dombyrashylar toby qatysty. Eki topqa bólinip kúı tartys jasaǵan jigitterdiń óner básekesi óte qyzý jáne tartysty ótti. Dombyra patıdi mýzeı qonaqtary men qyzmetkerleri tamashalady. Atalǵan sharada kúmbirlegen kerbez-kúıden shashý shashqan dombyrashylarǵa kórermender erekshe qoshemet kórsetip, jigerlendirip otyrdy. Merekelik shara barysynda Ulttyq mýzeıdiń dırektory Darhan Myńbaı sóz sóılep, ónerli jastardyń qadam­daryna sáttilik tilep, alǵys aıtty. Son­daı-aq, ultymyzdyń dástúrli ónerine, sonyń ishinde dombyraǵa árqa­shan da mýzeı tórinen oryn tabylatyndyǵyn jetkizdi. Budan keıin mýzeıdiń úlken májilis zalynda «Máńgilik El» de­gen taqyrypta konsert boldy. Kon­sertte bastan-aıaq «Aq jaý­yn» memlekettik kameralyq orkes­tri óner kórsetti. Orkestr jetek­shisi – Qazaqstannyń eńbek sińir­gen ártisi, kúıshi-kompozıtor Se­ken Tu­rys­bekov. Munda Seken Turysbekovtiń «Máńgilik El», «Aq jaýyn», Táttim­bettiń «Bestóre», Seıdolla Báıte­re­kov­tiń «Kishkentaı» kúılerimen qatar, taǵy da basqa óner týyndylary oryndaldy. «Qazaǵymnyń júreginen ja­ral­ǵan, dalamyzdyń únisiń sen, dombyra!», demekshi, zamana únimen bite qaı­nasqan kerbez kúıshi týyndysy kórer­menin bir sátte tolqytyp-tebi­rente aldy. Kúı álemin ózinshe sóı­letip, názik perneler arqyly syr­ly saz týdyryp, ásem áýennen sýret salǵan erekshe daryn ıesine bul jo­ly da halqy rıza bolyp, aıamaı qol soǵyp jatty. О́zderińizge belgili, talantty k­om­­­­po­zıtor S.Turysbekov «Máńgilik El» kúıi týrasynda baspasózge bergen bir suhbatynda: – Qaı memleket bolsa da óziniń urpaǵy, otany máńgilik bolǵanyn qalaıdy. Elbasynyń Joldaýda aıtqan «Máńgilik El» ıdeıasy da osy kúıdiń jaryqqa shyǵýyna áser etti. Mysaly, ánshiler, kúıshiler Elbasyna arnap án, kúı shyǵaryp jatsa, teris emes shyǵar. Bul kúı Elbasynyń oıyna, ıdeıasyna qoldaýshy bolsam, bir jaǵyna shyqqyń kelip, súıeý bolsam eken degen izgi nıetterden týyndady. «Máńgilik El» ıdeıasy – aldaǵy bolashaqtan kútken úlken úmit. Táýelsizdigimiz baıandy, eldigimiz máńgi, qoǵamymyz tynysh bolsa eken degen asyl arman, – deıdi. Taǵy birde: «Elbasymen bir kezdeskenimde «Seken, óz orkestrińdi qursań qaıtedi?» degen ıdeıany berdi. Sodan men Elbasynyń bul usy­nysyn maqul kórdim. Sóıtip, keıin «Aqjaýyn» orkestri dúnıege keldi desem, artyq aıtqandyq emes. Ujymymmen Astanaǵa kóship kelýi­me taǵy da Nursultan Ábishuly sebepker bolǵan edi», – degen bolatyn. Jıyn sońynda orkestr jetekshisi S.Turysbekov kórermenderdi qala kúnimen jáne Ulttyq mýzeıdiń 1 jyldyǵymen quttyqtady. «Máńgilik El» týyndysynyń avtory elimizben birge ónerimizdiń de máńgilik bolýyna tilektestik bildirdi. Raýshan TÁÝIRHANQYZY, jýrnalıst.