Soltústikqazaqstandyqtar oraq naýqanyn uıymshyldyqpen aıaqtap, eren eńbektiń úlgisin kórsetti. Bul týraly oblys basshysynyń birinshi orynbasary Aıdarbek Saparov makaron ónimderin shyǵaratyn «Sultan» ZMMK aksıonerlik qoǵamynda BAQ ókilderimen ótken brıfıngte málimdedi.
– 3,2 mıllıon gektar egistik alqaptarynan 5 mıllıon 425 myń tonna astyq jınalyp, ortasha túsim 16,9 sentner boldy. Jaýapty naýqanǵa 4 myńǵa jýyq seriktestik pen fermerlik sharýashylyq belsene atsalysty. Jambyl, Aıyrtaý, Qyzyljar, Esil aýdandarynda shyǵymdylyq 20 sentnerden aınaldy. Otan qambasyna jóneltilgen altyn dánniń 40 paıyzdan astamy 3-shi, qalǵandary 4-5-shi synyptardy quraıdy. Aýa raıynyń qubylmaly bolǵanyn eskersek, bul – jaqsy kórsetkish. Keler jyl tuqymmen tolyq qamtamasyz etildi.
Memlekettiń qýatty qoldaýy arqasynda bitik egin óskenin aıta ketkim keledi. Bıyl agroqurylymdar 17,5 mıllıard teńge mólsherinde jeńildikti demeýqarjy aldy. Kóktemgi-dala jumystaryna 73 myń tonna arzandatylǵan dızel otyny alynyp, ár lıtri 84 teńgeden bosatyldy. Tanaptarǵa 45 myń tonna mıneraldyq tyńaıtqysh sińirilip, 3 mıllıon gektar jer gerbısıdpen óńdeldi,–dedi Aıdarbek Seıpiluly.
Ol jýrnalısterdiń bıdaıdyń satý baǵasy qandaı bolmaq degen saýalyna bylaı jaýap berdi. Bir tonna 3-shi synypty bıdaı baǵasy 38-42 myń teńge tóńireginde. Azyq-túlik kelisimshart korporasııasynyń jergilikti fılıaly 42 myń teńgeden satyp alýda. Búginde berilgen nesıeniń úshten biri qaıtaryldy. Bul baǵytta jumys jan-jaqty júrgizilip jatqandyqtan, eshqandaı problema týyndamaýy tıis.
Ol qazirgi kezeńde jańa astyqtyń ónimderin qabyldaýmen syıymdylyǵy 3,4 mıllıon tonnalyq 54 elevator aınalysatynyn, budan tysqary agroqurylymdarda syıymdylyǵy 3,1 mıllıon tonnany quraıtyn qoımalar ornalasqanyn, eksportqa 2-2,5 mıllıon tonnadaıy shyǵarylatynyn jetkizdi.
Budan keıin BAQ ókilderi el táýelsizdiginiń alǵashqy jyldarynda boı kótergen «Sultan» elevator-dıirmen-makaron fabrıkasynda keń óris alǵan qyzý eńbek barysymen tanysty. Laboratorııa meńgerýshisi Anna Hlamovanyń aıtýynsha, munda kúnine 1500-1700 tonna el rızyǵy qabyldanyp, 50-ge jýyq makaron ónimderi daıyndalady eken. Ol úshin astyqtyń aqýyzy, qurǵaqtyǵy sekildi sapalyq qasıetteri qatty qadaǵalanady. Osynda astyq ótkizýge kelgen «Novomıhaılovka-2003» JShS-niń dırektory Gennadıı Shegolev gektar berekeliligin 23,3 sentnerge jetkizgen qýanyshyn BAQ ókilderimen bólisti. Oraqqa 14 kombaın jumyldyrylyp, qysqa merzimde eńserip shyǵypty.
Osylaısha, astyqty ólkeniń dıqan-mehanızatorlary bergen sertten kórinip, abyroı bıiginen súrinbeı ótti.
О́mir ESQALI,
«Egemen Qazaqstan».
Soltústik Qazaqstan oblysy.