Qarsylasy qashyp ketti

Shymkent qalasynda  álem chempıony ataǵy úshin arnaıy match ótýi tıis edi. Biraq... Másele bylaı boldy. Iýrgen Breımer, WBO júıesi boı­ynsha álem chempıony Germanııadan bir-aq shy­ǵyp­ty degen sybysty estip qaldyq. Tań azanymen Beı­bittiń ákesi Ámirhan kókemizdi jumys orny­nan bastyq. – Balam úshin júregim tilim-tilim bolyp bitti, –deıdi batyrdyń ákesi. – Ol osy sheteldikter keshikpeı kelse eken dep úsh kún boıy Almatynyń áýejaıynda júrdi. Jaq­sy qonaq úıge ornalastyr­dyq. Eshteńeden kemdik kórgen joq edi. – Sodan? – Amerıkanyń promoýterlik kompanııasynyń prezıdenti Gen Gýsson óziniń serikterimen ushyp kelgende áýejaıdan Iýrgen Breımerdi komandasymen kórip qa­la­dy. “Shúmenovpen bokstaspaı­myn, ishim aýyryp júr”, – depti. Osy jekpe-jektiń aldynda jahanǵa jar salyp: “Shúmenov­tiń qabyrǵasyn qaqyratamyn, eki beldigin de ózi týǵan qalasynda sheship alyp ketemin”, degen sa­ba­zyń as-sýdan ýlanyp qaldym dep eshkimge habar salmastan ta­banyn jaltyratyp úlgeripti. Jankúıerler ań-tań. Mun­daı­da ishi aýyrǵan adam tura qash­paı, dáriger kómegine jú­ginedi. Jekpe-jektiń ótpeý sebebin Qazaqstan Kásipqoı boks federa­sııasyna, halyqaralyq tıisti oryndarǵa bildiredi. “Men buryn­dy-sońdy mundaı myqty formaǵa kelgen joqpyn, ózimdi óte jaqsy sezinemin, jekpe-jekke tas túıin daıynmyn”, degen Iýrgenniń bu­laısha qubylýynda taǵy bir syr bar sekildi. Qazaq­standyqtar jaǵy aldyn ala analız tapsyrý týraly ótinish aıtqanda Breımerdiń bapkeri Mıhael Tım ony qulaǵynyń syrtymen tyń­dapty. Kampılo da Astanada jekpe-jek ótkizgennen keıin analız tap­syr­maı esigin tars jaýyp alyp, ashpaı qoıǵanynan habarymyz bar edi. Sol Kampılony da, Ýzel­kov­ty da syrt elde talqandaǵan Beıbit Shúmenovtiń týǵan jerinde as­qar taýdaı áke-sheshesi, alyp qor­ǵa­ny Qazaqstandaı Otanynda qos belbeýin ustatyp jiberýi erteginiń de sheńberine syımaıdy. “Ishi ót­ken” jyryndy Iýrgen Breımer osyny sezgen sekildi. Buzaqylyǵy úshin birneshe márte sotty bolǵan álem chempıony sońǵy kıkiljiń daýy­nan áli de qutylmapty. “Ol óz belbeýinen aıyrylyp qalmaýdy oılap, qorqaqtyq tanytty”,  deıdi sarapshylar. Qazaqstan Kásipqoı boks fede­ra­sııasynyń bas hatshysy Altyn­bek Nur­dáý­letovpen tildestik. – Bizdiń Beıbit sózsiz jeńetin edi. Áttegen-aı, – deıdi ol. –­ Nemis qýlyq istep ketti. Endi ol ha­lyq­aralyq sotqa tartylady. Bir­aq, Shymkentte aıtyl­ǵan kúni jekpe-jek ótedi. Beıbit óz ataǵyn qorǵap qalý úshin ame­rı­kalyq úsh dúr­kin álem chempıony Ýlıams Jopımen sharshy alańǵa shyǵady. Iýrgen Breımer so­laqaı bol­ǵandyqtan, Beıbit bapkerimen úsh aı urys taktıkasyn soǵan qurǵan edi. Al, Ýlıams – ońqaı. Aınaldyrǵan eki-úsh kúnde tak­tıkany qaıta túzý, psı­ho­lo­gııa­lyq daıyndyqqa bul ýaqyt óte az. Biraq, biz Beıbitke senemiz. Kónge WBA jáne IBA belbeýlerin qoıyp, qazaǵy­nyń atyn aıdaı álemge máshhúr etý úshin táýekelge barǵan erjúrek uly­myz nemis qashyp ketpegende TMD boıynsha dara boksshy bolar edi. Bul joly jeńse, ol  úsh dúr­kin álem chempıony bolady. Baqtııar TAIJAN. Shymkent. ------------------------------------ Sýrette: B.Shúmenov bapkerimen birge.