Elimiz Táýelsizdik alǵannan keıin ishteı tolǵanysqa túsip, jas memleketimizdiń negizgi rámizderiniń biri sanalatyn Gerb týraly oılana bastadym. Qazaq eliniń Eltańbasy buryn qaıtalanbaǵan tyń oılarmen beınelenýi kerek dep eseptedim.
Shynynda da osynaý rámizden ulysymyzdyń qazirgi jaǵdaıy kórinis taýyp, keleshekte qandaı bolatyny pash etilýi tıis-tin. Odan eń aldymen halqymyzdyń qabyrǵaly qasıetteri kórinýi kerek-tin. Ata-babalarymyz ǵasyrlar boıy bostandyq úshin kúresti. Kenesary han, Amangeldi batyr, Alash arystary, basqa da qanshama bozdaqtar osy jolda bastaryn qurbandyqqa tikti. Olaı bolsa, halqymyzdyń erkindikke, erkin el bolýǵa degen umtylysy Gerbimizden uǵylyp turǵany maqul emes pe. Sonymen birge ol eldiń táýelsizdigine, odan ári gúldenýine qyzmet etýi tıis edi.
Mine, Eltańba jobasy men nobaıyn jasaý barysynda osy jaılarǵa kóńil bóldim. Biz jasaǵan Eltańba jobasynyń ıdeıasy men mazmuny aıqyn. Zeńgir kók aspan aıasynda shańyraq ornalasqan. Ol týǵan uıamyzdyń nyshany. Jalpy kóshpeli halyqtardyń dástúrli uǵymynda búkil ǵalam kúmbez túrinde keıiptelgen ǵoı. «Shańyraǵyń bıik bolsyn!» degen tereń maǵynaly aq tilek, mine, osydan shyqqan. Keıbir aǵaıynǵa qazaq: «Shańyraqqa qara!» der edi.
Bul – eskertý. Tórime shyǵarsam da, tóbemde sekirtpeımin degen sóz. Negizinen alǵanda shańyraq: «Úıińe, otbasyńa beıbitshilik, aman-saýlyq tileımin. Osy keń álem sııaqty ósip, órken jaı», degen nıetti de ańǵartyp turǵan tárizdi. Eltańbada besburyshty juldyz, ańyzǵa aınalǵan aı múıizdi pyraq jáne «Qazaqstan» degen jazý alynǵan. Dástúrli qanatty tulpar – pyraq beınesi bıik samǵaýdy, bolashaq týraly armandy bildirgendeı. Tulpardyń kókke sermegen qanattary ortaq otaýymyz – shańyraǵymyzdy qorǵap tur. Pyraqtyń ańyzdaǵy shıratylǵan aı múıizi qaısarlyqty, qaırattylyqty kórsetkendeı ári kóne tarıhymyzdan da habar bergendeı.
Mine, eskız túrindegi osy jobany jýyrda ǵana baqılyq bolǵan aıaýly abyz aǵamyz, akademık Salyq Zımanov basqarǵan Úkimettiń arnaıy konkýrstyq komıssııasy maquldap, meniń jumysyma birinshi oryn bergen edi. Sóıtip ol Qazaqstan Respýblıkasy Joǵarǵy Keńesiniń VIII sessııasynyń qaraýyna usynylǵan bolatyn. Eldigimizdi beınelegen Eltańbamyz ómirge osylaı kelip edi.
Shot-Aman ÝÁLIHAN,
Memlekettik syılyqtyń laýreaty.