Prezıdent Qasym-Jomart Toqaev Ulttyq quryltaıdyń Atyraýda ótken úshinshi otyrysynda: «Yntymaǵy jarasqan, ortaq maqsatqa uıysqan ult eshqashan utylmaıdy, eshteńeden qur qalmaıdy. Bul iste zııaly qaýym aıryqsha ról atqarady. Ásirese elge sózi ótetin aǵa býynnyń orny bólek», dedi.
Memleket basshysynyń osy paıymy bıyl birqatar óńirde bolǵan alapat sý tasqyny kezinde belgili jýrnalıst-jazýshy, qoǵam qaıratkeri, Soltústik Qazaqstan oblysy Qoǵamdyq keńesiniń tóraǵasy, Petropavl qalasynyń turǵyny Jarasbaı Súleımenovtiń áleýmettik jelide «Iri bolaıyq!» degen taqyryppen jarııalaǵan shaǵyn jazbasyn oqyǵanda oıyma oraldy.
«Mine, birneshe kún boldy, joldasym ekeýmiz óz qolymyzben salǵan baspanamyzǵa jete almaı, aǵaıyndardy jaǵalap júrmiz. Biz turatyn Teplıchnyı aýyly da, úıimiz de sýdyń astynda qaldy. Áleýmettik jelidegi dostaryma osyndaı jazba usynamyn degen oıym joq edi. Biraq jelini qarap otyrsam, neshe túrli sózder aıtylyp jatyr. Kinálini izdeýshiler qaptap ketipti. Úlkeni de, kishisi de, áıeli de, eri de bılikti jerden alyp, jerge salyp jatyr. О́zimshe solarǵa basý aıtpaq oımen bir-eki aýyz sóz qaldyryp edim, keıbireýlerdiń meni de biraz jerge aparyp tastaǵysy keletinin baıqadym. Mende bireýdi aqtaıyn, bolmasa joǵarydaǵylarǵa jaǵynaıyn degen oı joq. Basqa túsken aýyrtpalyqty el bolyp kótereıik, shydaıyq, osaldyǵymyzdy basqalarǵa sezdirmeıik dedim. Tilde súıek joq eken dep, betimen ońdy-soldy bezeı berýge bolmaıdy ǵoı. Tasqynǵa qarsy qandaı jumystar atqarylǵanyn, osy iske jumyldyrylǵandardyń kúni-túni tize búkpegenin bilemin. О́zim de ishinde júrdim. Biraq esil eńbek zaıa ketti. Tasqyn sý buryn-sońdy bolmaǵan deńgeıge kóterildi, ekpini de adam aıtqysyz boldy. Naǵyz apat! Eshkimdi aıaǵan joq. Shydamaǵanda qaıda baramyz?!
Bul rette japondardan úlgi alýymyz kerek dep oılaımyn. Olar jer silkinisinen kelgen zardapty tistenip júrip, birligimen, muqalmas erik-jigerimen jeńdi ǵoı. Ulttyń iriligi de, usaqtyǵy da osyndaı syn saǵatta kórinedi. Iri bolaıyq! Qansha qıyn bolsa da, shydaý kerek. Mundaı syn-qaterlerge talaı el tap bolyp jatyr ǵoı. Sabyr saqtaıyq. Eń bastysy – elimiz aman bolsyn! Endi qıyndyqtan shyǵýdyń jolyn izdegennen basqa tańdaý joq bizde», dedi ol.
Basyna túsken qıyndyqty qaıyspaı kótere bilgen qara nar – el aǵasynyń sózi bul. О́tken ǵasyrdyń toqsanynshy jyldarynda, qarapaıym jýrnalıst kezinde shynaıy básekeli saılaýda jeńiske jetip, oblystyq máslıhattyń depýtaty bolyp saılanǵan soń sessııalarda talaı ret Qyzyljar óńiriniń kókeıkesti máselelerin kóterip, oblys basshylaryn bet-júzine qaramaı qatty synaǵan, keıin Parlament Májilisiniń depýtaty bolǵanynda da halyqtyń muńyn muńdap, joǵyn joqtaǵan Jarasbaı aǵamyzdyń etigimen sý keship júrgen sátinde de azamattyq ustanymynan aınymaı aıtqan syndarly pikirine rıza boldyq.
Halqymyzdyń dańqty uly Baýyrjan Momyshuly qart adamdardy tórtke bólip, tútin ańdyp, úı aralap, ósek aıtatyndardy shal dep, óz áýletin ýysynda ustap, bılik júrgizetinderdi qarııa dep, tutas bir aýyldyń qamyn jep, azamatyn atqa mingizip, aıdynyn asyratyndardy aqsaqal dep, al búkil eldiń sózin sóılep, namysyn jyrtyp, daý-damaıyn sheship, arǵy-bergi tarıhtan áńgime qozǵap, tula boıyna ulttyq rýh, izgi qasıetterdi molynan sińirgenderdi abyz dep ataǵan eken. Búginde jetpistiń bel ortasyna jaqyndap qalǵan Jarasbaı aǵamyzdy sondaı abyz adam desek, asyra aıtqandyq bolmas.
Shyntýaıtynda, qazir el ishinde shal kóp, qarııa saýsaqpen sanarlyq, al aqsaqal tym az, abyz tipti sırek sııaqty. Máselen, budan biraz jyl buryn bir oblysta joǵary laýazymdy qyzmet atqaryp júrgen, jasy alpysty alqymdaǵan aǵaıynǵa: «Osy óńirdiń túıini tarqatylmaǵan túıtkilderin bir adamdaı bilesiz, solar jaıly oblys ákimine nege aıtyp otyrmaısyz?» degenimiz bar. Sonda ol qabaǵyn túksıtip: «Inishek, maǵan aqyl aıtpaı-aq qoı. Men óz jónimdi bilemin. Ákim: «At!» dese – atamyn, «Jat!» dese – jatamyn», dep jaýap bergen edi. О́kinishke qaraı, sol sheneýnik sııaqty, ákimqaralarǵa tek madaq sóz aıtyp, jaǵynyp-jaǵympazdanyp, «Lápbaı, taqsyr!» dep quldyq uryp, qulqynynyń quly bolyp júrgen qarttar kóp qazir. Baýyrjan aǵamyz aıtqan «shaldyń» bir surpy solar bolar...