Senat depýtattary Darhan Qydyráli men Rýslan Rústemov Almaty oblysynyń Jańalyq aýylyndaǵy saıası qýǵyn-súrgin qurbandarynyń murajaıynda boldy.
Depýtattar mýzeı qyzmetkerlerimen jáne «Arys» qorynyń, mádenıet, arhıvter jáne qujattama basqarmasynyń, sondaı-aq Almaty oblystyq Mýzeıler qaýymdastyǵynyń ókilderimen kezdesti. Júzdesýde Jańalyq aýylynda ǵylymı-zertteý jumystaryn qarjylandyrý máseleleri talqylandy. Bul aýylda saıası qýǵyn-súrginge ushyraǵan 163 adamnyń súıegi zertteldi jáne genetıkalyq taldaý júrgizý arqyly olardyń 50-i týraly derekter anyqtaldy.
Senator Darhan Qydyráli Túrkistan oblysynda bolǵan kezde Qoja Ahmet Iаsaýı kesenesiniń jaı-kúıimen jáne qalpyna keltirý jumystarymen tanysty. Túrkistandaǵy №42 kóshede salynyp jatqan mektep qurylysynyń alańynda da boldy. Senator sapar barysynda qalalyq máslıhat depýtattarymen kezdesti. Onda máslıhattardyń rólin, zańdardy iske asyrý barysy men Túrkistan qalasynyń erekshe mártebesi týraly zań jobasyn talqylady.
Senat depýtaty sonymen qatar ejelgi Saýran qalasyn zertteý aımaǵynda boldy jáne arheologııalyq qazba jumysynyń barysymen tanysty. Bul kóne qala – aımaqtaǵy mańyzdy tarıhı-mádenı eskertkish jáne ony zertteý ótkendi bilýde zor mańyzǵa ıe ekeni aıtyldy. Alaıda zertteý jumysynyń mańyzyna qaramastan, qarjy tapshylyǵyna baılanysty qolǵa alynǵan aýqymdy ister toqtap qalǵan bolatyn. Darhan Qydyráli bul máselege alańdaýshylyq bildirip, qazba jumystaryn jalǵastyrý, Saýran qalasynyń ornyndaǵy tarıhı eskertkishterdi saqtaý úshin qarjylandyrý qajettigin atap ótti.
Senator sondaı-aq Qoja Ahmet Iаsaýı atyndaǵy Halyqaralyq qazaq-túrik ýnıversıtetinde bolyp, Memleket basshysynyń «TURKTIME-túrik dáýiri» baǵdary aıasynda júrgizilip jatqan jumystardy talqylady.